Ўзбекистондаги мактабгача таълим муассасалари ёпилмаслиги, ўз фаолиятини одатдаги тартибда давом эттириши хабар қилинганди. Мактабгача таълим вазирлиги матбуот котиби «Bugun.uz»га боғчалар нега онлайнга ўтмагани сабабини маълум қилди.

Қайд этилишича, давлат мактабгача таълим ташкилотларининг ёпилиши режалаштирилмаган. Бунга сабаб оилада фарзандга қарайдиган киши бўлмаса, ота-она уйда ўтиришига тўғри келади.

«Карантин қоидалари республика бўйича кучайтирилгани билан давлат ташкилотларининг иш фаолияти тўхтатилмаган. Бу бевосита болалар билан боғлиқ, чунки ташкилотлар ёпиладиган бўлса, оилада фарзандга қарайдиган киши бўлмаса, ота-она уйда ўтиришига тўғри келади.

Қайсидир гуруҳда коронавирус аниқланса, ўша гуруҳ 14 кунга ёпилади ва ундан кейин ўз фаолиятини давом эттиради», — дейди Мавлуда Асқархўжаева.

Эслатиб ўтамиз, аввалроқ Ўзбекистонда 24 январдан бошлаб мактаблар бир ой давомида онлайн фаолият олиб бориши маълум қилинганди.