Қирғизистон ва Россия Дубайда бўлиб ўтаётган «EXPO–2020» Бутунжаҳон кўргазмаси доирасида кам қувватли атом электр станциясини қуриш бўйича келишиб олди. Бу ҳақда «Росатом» компанияси хабар берди.

Келтирилишича, Қирғизистон Энергетика вазирлиги ва Россия давлат корпорацияси ўртасида кам қувватли атом электр станцияларини қуриш бўйича ҳамкорлик тўғрисидаги меморандум имзоланган. Ҳужжатда томонлар Қирғизистондаги «РИТМ–200Н» реактор заводи негизида кичик АЭС қуриш бўйича ҳамкорликни ривожлантиришдан манфаатдор эканини билдирган.

«Қирғизистонда бундай атом электр станциясининг қурилиши нафақат мамлакатнинг энергетик мустақиллигига хизмат қилади, балки бутун Марказий Осиё минтақаси аҳолисининг ҳаёт сифати ва илмий-техник салоҳиятини ривожлантиришга ҳам таъсир қилади», — деган Росатом бош директори Алексей Лихачев.

Аввалроқ Қозоғистоннинг собиқ президенти Нурсултон Назарбоев республикада атом электр станцияси қурилишини маълум қилганди. Шунингдек, мамлакатда АЭС қурилишига қарши петиция бошланганди.