Туркия пойтахти Анқарада бир гуруҳ эркаклар 500 метрлик кўприкни бўлакларга бўлиб, металлоломга топширди. Бу ҳақда «Daily Sabah» хабар берди.

Маълум қилинишича, ўғирланган кўприк 1936 йилда қурилган бўлиб, у 40 йил аввал сув тошқини туфайли вайрон бўлгач, яроқсиз ҳолга келган. Шундан сўнг аҳоли ундан фойдаланишни тўхтатган, расмийлар эса янги ўтиш жойини қурган.

Қайд этилишича, бир неча киши махсус техника (бульдозер ва юк машиналари) ёрдамида тўрт кун давомида эски кўприкни демонтаж қилган ва фақат бетон пойдеворини қолдирган. Шу тариқа улар 70 тоннага яқин метални сотишга муваффақ бўлган.

Кўприкнинг ғойиб бўлганини воқеа жойида патруллик қилаётган ҳуқуқ-тартибот идоралари ходимлари аниқлаган. Ўз навбатида, маҳаллий аҳоли кўприк бузилиши ҳокимият қарори билан амалга оширилганига ишонган. Полиция ўғриларни ҳибсга олган.

Аввалроқ Туркияда Европадаги энг узун туннель қурилиши якунланаётгани ҳақида хабар қилинган.