АҚШда чоп этилган учта тадқиқотда бустер дозасиз «омикрон» штамига қарши курашиб бўлмаслиги маълум қилинди. Бу ҳақда «Associated Press» хабар берди.

Маълум қилинишича, бу «омикрон»га қарши коронавирус вакциналарини ҳимоя қилиш масаласини ўрганган АҚШнинг биринчи йирик тадқиқотидир. Америка тадқиқотлари натижалари Германия, Жанубий Африка ва Буюк Британиядаги мутахассислар эришган хулосаларни эслатган. Уларнинг сўзларига кўра, қўлланилган вакциналар коронавируснинг олдинги штаммлари билан солиштирганда «омикрон»га қарши самарасиз, аммо қайта эмлаш инфекциядан ҳимояни сезиларли даражада оширади.

Таъкидланишича, бунга алоқадор иккита мақола АҚШ Касалликларни назорат қилиш ва олдини олиш марказлари веб-сайтида, учинчиси эса Америка Тиббиёт ассоциацияси журналида чоп этилган.

Маълумот учун, АҚШда аҳолининг 63 фоиздан ортиғи коронавирусга қарши эмланган. Умуман олганда, коронавирус пандемияси даврида мамлакатда 70,5 миллиондан ортиқ ковид ҳолати қайд этилган, 883,9 мингдан ортиқ бемор вафот этган, 44 миллиондан ортиғи тўлиқ даволанган.

Аввалроқ ковиднинг келиб чиқишига оид яна бир таҳмин илгари сурилганди. Шунингдек, коронавируснинг янги хусусияти ҳақида маълумот берилган.