Самарқанд вилоятида машиналар оқимига қарама-қарши тарзда ҳаракатланган «Lacetti» ҳайдовчисига баённома тузилди. Бу ҳақда Йўл ҳаракати хавфсизлиги хизмати хабар берди.

Таъкидланишича, ижтимоий тармоқда «Lacetti» русумли, 30 M 114 HA давлат рақам белгили автомобиль ҳайдовчиси транспорт воситаларининг оқимига қарама-қарши тарзда ҳаракатлангани акс этган видео тарқалган ва кенг жамоатчилик муҳокамаларига сабаб бўлган.

Видео юзасидан Самарқанд вилояти ИИБ ЙҲХБ масъул ходимлари томонидан суриштирув олиб борилиб, қоидаларни қўпол тарзда четлаб ўтган ҳайдовчига нисбатан Маъмурий жавобгарлик тўғрисидаги кодекснинг 128⁵-моддаси (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши) тартибида баённома расмийлаштирилган.

«Барча ҳайдовчилардан қоидаларга риоя қилишларини, йўлларда ўзи ва атрофдагилар саломатлигини хавф остига қўймасликларини сўраймиз», дейилади хабарда.

Аввалроқ Фарғонада автомобиль рулини ўнг томонидан ўтириб бошқарган ҳайдовчига чора кўрилганди.