Тошкент вилояти Нурафшон шаҳрида 17 январь куни эркак онасининг танишини ёғоч бўлаги билан уриб ўлдирди. Бу ҳақда Ички ишлар вазирлиги ҳузуридаги Тергов департаменти ахборот хизмати хабар берди.

Маълум бўлишича, воқеа соат 21:30 атрофида шаҳарнинг Нурафшон маҳалласидаги уйда содир бўлган. Аниқланишича, 27 ёшли П.М. 55 ёшли онаси Б.Д. 57 ёшли таниши Н.Р. билан спиртли ичимлик истеъмол қилиб ўтирганидан жаҳли чиқиб Н.Р. билан жанжаллашган.

Келишмовчилик пайтида П.М. ёғоч бўлаги билан Н.Р.нинг чап сон қисмига ва танасининг дуч келган жойларига қўли ва оёғи билан уриб, тан жароҳати етказган. Оқибатда жабрланувчи олган тан жароҳатлари билан шифохонада вафот этган.

Ҳолат юзасидан Нурафшон шаҳар ички ишлар бўлими ҳузуридаги тергов бўлинмаси томонидан П.М.га нисбатан Жиноят кодексининг 104-моддаси (жабрланувчининг ўлишига сабаб бўлган қасддан баданга оғир шикаст етказиш) 3-қисми билан жиноят иши қўзғатилган. Ҳозирда тергов ҳаракатлари давом этмоқда.

Аввалроқ Навоийда иш ҳақи талашган ука акасини кетмон билан уриб ўлдиргани ҳамда Бухорода эркак хотинини пичоқлаб ўлдиргани хабар қилинганди.