Наманганда 22 январь куни бир гуруҳ эркаклар кўчада қуш овлади. Вилоят Экология ва атроф-муҳитни муҳофаза қилиш бошқармаси ахборот хизмати ҳолат юзасидан маълумот берди.

Маълум қилинишича, «Наманганда браконьерлар овга чиқишибди» сарлавҳаси остида ижтимоий тармоқларда видео тарқалган. Воқеа юзасидан Экология ва атроф-муҳитни муҳофаза қилиш соҳасидаги назорат бўйича Наманган шаҳар инспекцияси, вилоят Ички ишлар бошқармаси пост-патрул хизмати, Жамоат тартибини сақлаш бошқармаси ходимлари биргаликда лавҳада кўрсатилган жойга бориб, ваколат доирасида ўрганмоқда.

«Ҳолат юзасидан ўрганишлар якуни бўйича қўшимча маълумот берилишини билдирамиз», дейилади хабарда.

Таъкидланишича, ҳозирда видеотасвирдаги шахслар воқеа жойида йўқлиги сабабли яқин атрофдаги кузатув камералари кўздан кечирилмоқда.

Аввалроқ Сирдарёда «Қизил китоб»га киритилган лочинларни 280 миллион сўмга сотмоқчи бўлганлар ушланганди. Шунингдек, Андижонда 22 ёшли йигит «Қизил китоб»га киритилган лочинни сотаётгани аниқланганди.