Навоийда 22 январь куни ЙПХ ходими ҳайдовчи томонидан калтаклангани маълум қилинди. Йўл ҳаракати хавфсизлиги хизмати ҳолат юзасидан муносабат билдирди.

Маълум қилинишича, соат тахминан 12:20 да вилоятнинг Навбаҳор тумани ҳудудидан ўтувчи автомобиль йўлида ЙПХ ходими Д.Тошев томонидан «Matiz» русумли автомобиль ҳайдовчиси тўхтатилган.

Қайд этилишича, текширув давомида ҳайдовчи йўловчи ташиш фаолияти билан шуғулланиши, унинг ёнида кунлик йўл варақаси мавжуд эмаслиги маълум бўлган. Шундан сўнг ЙПХ ходими томонидан ҳайдовчига нисбатан маъмурий баённома тузилган. Автомобиль вақтинча сақлаш учун жарима майдонига олиб кетилаётган вақтда эса 1993 йилда туғилган ҳайдовчи А.Т. ЙПХ ходимига фаол қаршилик кўрсатган ва тортишувли вазият юзага келган.

Таъкидланишича, ҳолат содир бўлган жойга туман ИИБ тезкор тергов гуруҳи ва прокуратура ходимлари чиқиб, тегишли ҳужжатлар расмийлаштирилган. Ҳозирда туман прокуратураси томонидан суриштирув ҳаракатлари олиб борилмоқда.

Аввалроқ Хоразм вилояти Ҳазорасп туманида фуқаролар ЙПХ ходими тунги вақтда маҳаллада рейд ўтказгани сабаб унинг хизмат олиб боришига қаршилик кўрсатганди. Шунингдек, Андижонда прокуратура ва ИИБ ходимлари ўртасида тортишув бўлгани айтилган хабарга изоҳ берилган.