Президент «2022–2024 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги қарорни имзолади. Бу ҳақда Адлия вазирлиги ахборот хизмати хабар берди.

Маълум қилинишича, қарор билан 2022–2024 йилларда Ўзбекистоннинг ижтимоий ва ишлаб чиқариш инфратузилмасини ривожлантириш дастури қабул қилинган.

Таъкидланишича, дастур доирасида белгиланган йилларда ижтимоий ва ишлаб чиқариш инфратузилмасини ривожлантириш учун жами 76 минг 881 миллиард сўм ажратилади. Шунга кўра, мазкур йилларда, жумладан, қуйидаги ижтимоий ва ишлаб чиқариш объектларини ишга тушириш назарда тутилган:

● 54 230 ўқув ўрни ва 8358 та ётоқ ўрнига эга олий таълим муассасалари;
● 259 101 ўқув ўрнига эга, 248 та спорт залдан иборат умумтаълим, ижод ва ихтисослаштирилган мактаблар;
● 88 310 ўринга эга мактабгача таълим ташкилотлари;
● 24 213 ўринга эга соғлиқни сақлаш муассасалари.

Шунингдек, маълум қилинишича, қарор билан ижтимоий ва ишлаб чиқариш инфратузилмасини ривожлантириш бўйича Республика комиссияси тузилган бўлиб, комиссия дастурда иштирок этаётган вазирлик, идора, хўжалик бирлашмалари ва маҳаллий ҳокимликлар фаолиятини мувофиқлаштириб боради.

Қайд этилишича, дастурлар доирасида режалаштирилган маблағни ички манбалар ҳисобидан жалб қилинган қарз маблағлари, хорижий кредитлар ва улар бўйича ҳисобланган фоиз тўловини қоплашга, шунингдек, объектлар қуриш учун кредитлар ажратишга йўналтириш тақиқланади. Қарорга кўра, 2022 йилдан:

• икки йил муддатга вазирликлар, идоралар ва маҳаллий ҳокимликларнинг маъмурий биносини қуриш ва реконструкция қилиш бўйича янгидан бошланадиган лойиҳаларни (Президент қарорига мувофиқ амалга ошириладиган, шунингдек, янгидан ташкил этиладиган шаҳар ва туманларда жойлашадиган лойиҳалар бундан мустасно) мамлакатнинг ижтимоий ва ишлаб чиқариш инфратузилмасини ривожлантириш дастурларига киритиш тақиқланади;
• келгуси йиллар учун ижтимоий ва ишлаб чиқариш инфратузилмасини ривожлантириш дастурларини шакллантириш жараёнида кейинги йилларга ўтадиган лойиҳалар (объектлар) сони босқичма-босқич қисқартирилади ва уларни тегишли молиявий йилда фойдаланишга топшириш назарда тутилади.
• 2022 йилда якунланадиган таълим муассасалари объектлари 15 августгача, соғлиқни сақлаш ва тиббий-ижтимоий муассасалар объектлари 1 октябргача, ирригация ва мелиорация тизимлари объектлари 1 декабргача фойдаланишга топширилади.

Аввалроқ «Меҳр дафтари» тизимини жорий этиш тартиби белгиланганди.