Туркия ва Қатар ҳукуматлари Кобул аэропорти фаолиятини бошқариш бўйича дастлабки келишувга эришди. Бу ҳақда «TOLOnews» хабар берди.

Келтирилишича, Афғонистон Транспорт ва фуқаро авиацияси вазирлиги ҳам Туркия ва Қатар техник гуруҳлари билан Кобул аэропортини бошқариш бўйича келишувга эришганини тасдиқлаган. Вазирлик техник гуруҳ музокараларни давом эттириш учун Қатарга боришини айтган.

«Авиация ва аэропорт хавфсизлиги бўйича умумий келишув бўлди. Қайси соҳаларда техник ишлар зарурлигини аниқлаштириш керак эди», — деган вазирлик матбуот котиби Имомуддин Аҳмадий.

Таъкидланишича, томонлар ўртасидаги музокарларда Афғонистондаги 5 та аэропорт масаласида фикр алмашилган. «Уч томон музокаралар жараёнидан мамнун эканлигини билдирди ва келгуси ҳафта Доҳада муҳокамани янги босқичда якунлашга келишиб олди», дейилади Қатар ТИВ баёнотида.

«Аэропортни бошқариш Афғонистон фуқаро авиацияси маъмурияти томонидан амалга оширилади. Фақатгина техник гуруҳлар етишмаётган бўлимлар хориж компаниялари билан шартнома тузади», — деган Афғонистон расмийси.

Музокара савдогарлар афғон маҳсулотларини хорижга олиб чиқиш учун авиакомпаниялар йўқлигидан шикоят қилиши фонида бўлиб ўтган.

«Халқаро рейсларнинг етишмаслиги компаниямга 3000 доллар зарар келтирди. Музокара қанчалик тезроқ бўлса, шунча яхши бўлади. Бу Афғонистонга савдо, экспорт ва импорт, одамларнинг саёҳати каби бир қанча жиҳатларда фойда келтиради», — деган Саноат ва кон палатаси раҳбари Ширбаз Камин Зада.

Аввалроқ «Толибон» Кобул аэропортини ким бошқаришига ойдинлик киритганди. Шунингдек, Ўзбекистон Мозори Шарифдаги халқаро аэропортни қачон тиклаши маълум бўлган.