Туркманистон президенти Гурбангули Бердимуҳамедов Ўзбекистон орқали бошқа давлатларга электр энергияси етказиб берилиши мумкинлигини маълум қилди. Бу ҳақда Туркманистон давлат ахборот агентлиги хабар берди.

Маълум қилинишича, давлат раҳбари 20 январь куни мамлакатнинг Тошҳовуз вилоятига ташриф буюрган ва унга мамлакат энергетика тизимининг бир қисмига айланадиган Болқон–Тошҳовуз электр узатиш линияси қурилиши ҳақида сўзлаб берилган, турли ҳудудлардаги электр узатиш линиялари, подстанциялар ва Тошҳовуз давлат электр станциясининг лойиҳаси кўрсатилган.

Барча тақдимотлардан сўнг Бердимуҳамедов энергетика мавзусида ишчи учрашув ўтказган. Давлат раҳбарининг фикрича, табиий ресурслар Туркманистонга дунёдаги энг йирик энергетика давлатларидан бирига айланиш имконини берган.

«Маҳаллий истеъмолчи электр энергияси билан ишончли ва узлуксиз таъминланган. Эндиликда биз зарур ҳажмдан ортиқ ишлаб чиқарилган электр энергиясини турли йўналишлар бўйича бошқа давлатларга экспорт қилмоқдамиз», — деган давлат раҳбари ва айни пайтда Туркманистон электр энергияси Эрон, Афғонистон, Ўзбекистон ва Қирғизистонга экспорт қилинаётганини айтган ҳолда.

Президентнинг сўзларига кўра, бундан ташқари, электр энергиясини Эрон ва Ўзбекистон орқали учинчи давлатларга етказиш режалаштирилган.

Аввалроқ Туркманистон Ўзбекистонга электр энергияси экспортини кўпайтириш учун янги станцияни ишга туширганди. Шунингдек, Тожикистон 2021 йилнинг октябрь ойида Ўзбекистон ва Афғонистонга электр энергияси экспортини қарийб 10 бараварга қисқартирганди.