Янгиликлар - 14:16 · 24.01.2022

Қарши давлат университетида 38 туп дарахт ноқонуний кесиб ташланди — фото

Қашқадарё вилоятидаги Қарши давлат университетида 38 туп дарахт ноқонуний кесиб ташланди. Бу ҳақда Экология қўмитаси ахборот хизмати хабар берди.

Фото: Telegram / @ekologuz

Маълум бўлишича, 13–15 январь кунлари Экология қўмитасининг давлат инспекторлари томонидан дарахт кесиб ташланган жойда ўрганиш ишлари олиб борилган. Аниқланишича, университет томонидан Ягона давлат интерактив хизматлари портали орқали давлат ўрмон фондига кирмайдиган дарахтларни кесиш учун уч маротаба мурожаат қилинган ва бу тўғрисида рад жавобини олган.

Фото: Telegram / @ekologuz

Қайд этилишича, Экология ва атроф-муҳитни муҳофаза қилиш бошқармаси томонидан рад жавоби берилганига қарамасдан, жами 38 туп дарахт ноқонуний кесилган. Ҳуқуқбузарликка алоқадор шахслардан тушунтириш хатлари олинди.

Фото: Telegram / @ekologuz

Мазкур қонунбузарлик ҳолати бўйича ўсимлик дунёсига етказилган зарар 267 миллион 543 минг сўм миқдорида ҳисобланди. Ҳодисага оид материаллар ҳуқуқни муҳофаза қилиш органларига тақдим этилган.

Аввалроқ Андижондаги туғуруқхонада 12 туп соғлом дарахт кесиб ташлангани ҳамда ҳолат юзасидан шаҳар ободонлаштириш бошқармаси бошлиғи Ғ.Ш.га нисбатан жиноят иши қўзғатилгани хабар қилинганди.