Янгиликлар - 9:04 · 29.01.2022

Ўзбекистоннинг хавфсиз давлатлар рейтингидаги ўрни маълум бўлди

«Numbeo» таҳлилий хизмати 2022 йилда саёҳат қилиш учун хавфсиз бўлган мамлакатлар рейтингини эълон қилди. Ўзбекистон жиноятчилик кўрсаткичида 142 та давлат ичида 105-ўринни эгаллади.

Фото: «Bugun.uz»

Рейтингга кўра, Ўзбекистонда жиноятчилик кўрсаткичи 33,76 бални, хавфсизлик эса 66,24 бални ташкил қилган. Қатар дунёдаги энг хавфсиз давлат деб топилган. Жумладан, у рейтингда 142-ўринни қайд этиб, жиноятчилик индекси 13,7 балл, хавфсизлик индекси эса 86,2 бални ташкил қилган.

Ўз навбатида, Венесуэла энг хавфли давлат деб топилган. Рейтингда давлатнинг жиноятчилик корсаткичи 83,58 бални, хавфсизлик эса 16,42 бални ташкил қилган.

Қайд этилишича, хавфсизлик индексини ҳисоблаш «Numbeo» томонидан ўтказилган сўровларга асосланган бўлиб, у мамлакатда жиноятчилик даражаси қанчалик паст ёки юқори эканини кўрсатади.

Аввалроқ Ўзбекистон армияси дунёда нечанчи ўринда туриши ва мамлакатнинг глобал киберхавфсизлик рейтингидаги ўрни эълон қилинган.