Андижонда машинасида дрифт қилган ҳайдовчига чора кўрилди — видео
Андижонда «Lacetti» русумли машинасида дрифт қилган ҳайдовчига чора кўрилди. Йўл ҳаракати хавфсизлиги хизмати ҳолат юзасидан маълумот берди.
Маълум қилинишича, «Lacetti» русумли автомобиль ҳайдовчиси турли хавфли дрифтлар қилиб, қарама-қарши йўналишга чиқиб ҳаракатлангани акс этган видео ижтимоий тармоқда тарқалган ва жамоатчилик эътирозига сабаб бўлган.
Қайд этилишича, ҳолат Андижон вилояти Ички ишлар бошқармаси Йўл ҳаракати хавфсизлиги бошқармаси томонидан ўрганилган.
Натижада «Lacetti» русумли автомобилнинг 1999 йилда туғилган ҳайдовчиси М.Х.га нисбатан транспорт воситасига рухсат этилмаган мослама ўрнатгани ва қарама-қарши йўналишга чиқиб ҳаракатлангани бўйича ўрнатилган тартибда маъмурий баённома расмийлаштирилиб, автомобиль вақтинча сақлаш учун жарима майдонига қўйилган.
Аввалроқ Самарқанд туманида «Nexia» русумли машинасида дрифт қилган ҳайдовчига чора кўрилгани маълум бўлганди. Шунингдек, Тошкент шаҳри Мирзо Улуғбек туманида машинасида дрифт қилиб, видеога олган ҳайдовчиларга чора кўрилганди.
