Қирғизистон Парламентида қирғиз-ўзбек чегарасидаги назорат-ўтказиш пунктлари сонини кўпайтириш таклиф қилинди. Бу ҳақда «24.kg» хабар берди.

Маълум қилинишича, мазкур таклиф депутат Бакит Тўрабоев томонидан берилган. У Ўзбекистон Жалолобод вилояти билан чегарада назорат-ўтказиш пункти очишга тайёрлигини қайд этган.

«Сузоқ туманида ‘Бекобод’, Оқсида ‘Нанай’ назорат пункти бор. Ўзбекистон мазкур назорат-ўтказиш пунктларини очишга тайёр, бизникилар эса шошилмаяпти. Агар 2020 йилда Қирғизистонга 2,2 миллион сайёҳ ташриф буюрган бўлса, уларнинг 68 фоизини Ўзбекистон фуқаролари ташкил этади. Фарғона водийсида 11 миллион аҳоли истиқомат қилади. Ўтказиш пунктини очиш орқали биз фақат сайёҳлар сонини кўпайтириб, ҳудуд ривожини таъминлаймиз», — деган депутат.

Аввалроқ Қирғизистон парламентида Ўзбекистонга элчи тайинлаш кун тартибидан олиб ташланганди. Шунингдек, мамлакат аҳолиси Ўзбекистон билан муносабатларга баҳо берганди.