Тошкент вилояти Божхона бошқармаси ходимлари томонидан пневматик тўппонча ва ўқларни ноқонуний олиб кирмоқчи бўлган фуқаролар ушланди. Бу ҳақда Давлат божхона қўмитаси ахборот хизмати хабар берди.

Жумладан, «Ғишткўприк» чегара божхона постига кириб келган фуқаро Е.А. бошқарувидаги «Toyota Land Cruiser» русумли автотранспорт воситаси холислар иштирокида божхона кўригидан ўтказилган. Натижада автомашинада тегишли ҳужжатлари ва оғзаки сўровда айтилмаган 1 дона пневматик тўппонча, 2 дона пневматик тўппонча учун газ баллон ҳамда 310 дона пневматик ўқ борлиги аниқланган.

Яна бир ҳолатда вилоят божхона бошқармаси «С.Нажимов» чегара божхона постига кириб келган фуқаро А.И. бошқарувидаги автотранспорт воситаси божхона кўригидан ўтказилган. Натижада автомашина юкхонасидаги чанг ютгич ичида йўловчи божхона декларациясида ёзиб кўрсатилмаган ва оғзаки сўровда маълум қилинмаган 1 дона пневматик тўппонча ҳамда 243 дона пневматик тўппонча учун мўлжалланган ўқ борлиги аниқланган. Ҳозирда ушбу ҳолатлар юзасидан божхона органлари томонидан суриштирув ҳаракатлари давом эттирилмоқда.

Аввалроқ Ўзбекистон божхона қўмитаси салкам 4,7 миллиард сўмлик пиротехника воситалари савдосини тўхтатиб қолгани ҳақида хабар берилганди.