Ўзбекистонда боқувчисини йўқотганлик нафақасини олиш ёши узайтирилди. Бу ҳақда «Ҳуқуқий ахборот» хабар берди.

Таъкидланишича, «Фуқароларнинг ва тадбиркорлик субъектларининг ҳуқуқлари кафолатлари янада кучайтирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун Президент томонидан имзоланган.

Киритилган қўшимчаларга мувофиқ, ногиронлик пенсиялари Чернобиль АЭСдаги авария оқибатида III гуруҳ ногирони бўлган шахсларга ҳам тўланади. Илгари фақат I ва II гуруҳ ногиронларига тўланиши белгиланган.

Шунингдек, оиланинг меҳнатга қобилиятсиз аъзолари (болалар, ака-укалар, опа-сингиллар ва набиралар) ёши 18 ёшгача этиб белгиланди. Илгари 16 ёшгача эди.

Ўқувчилар ва талабалар ўқиши давомида 23 ёшгача боқувчисини йўқотганлик нафақасини олиши мумкинлиги белгиланди. Илгари 18 ёшгача эди. Болани парваришлаш таътилининг иш стажига қўшиладиган даври 6 йил этиб белгиланди. Илгари жами 3 йилдан кўп бўлмаган давр киритилган.

Қонунга кўра, автомобиллар электрон аукцион орқали ижарага берилганда шартномани нотариал тасдиқлаш талаб этилмайди.

Шунингдек, қуйидагиларнинг қўшилган қиймат солиғидан озод қилиш муддати 2022 йил 30 апрелгача узайтирилди:

• Ўзбекистонга ўсимлик ёғи, кунгабоқар ва зиғир уруғи, шунингдек, соя данагини олиб кириш;
• ўсимлик ёғини (пахта ёғидан ташқари) ишлаб чиқариш ва (ёки) реализация қилиш бўйича айланма. Илгари 2021 йил 31 декабргача эди.

Аввалроқ болаларни қўллаб-қувватлаш мақсадида боқувчисини йўқотганлик пенсиясини олувчи болалар олий таълим муассасаси ёки академик лицейга кирадиган бўлса, уларнинг боқувчисини йўқотганлик пенсияси 23 ёшгача узайтирилиши бўйича тегишли моддаларга ўзгартириш киритиши айтилганди.