Шавкат Мирзиёев Самарқандга қилган ташрифи давомида яқинда Тошкентда тезлик кўпи билан 60 км/соатгача белгилангани ҳақида қарор чиқишини маълум қилди. Бу ҳақда журналист Азиза Қурбонова хабар бермоқда.

Таъкидланишича, Президент Самарқандда янги қурилган ерости тоннели, йўлларни кўздан кечира туриб, хавфсиз йўл, хавфсиз пиёда концепциясини яратиш ҳақида сўзлаган ва шундай деган: «Яқинда Тошкентда тезлик кўпи билан 60 км/соатгача белгилангани ҳақида қарор чиқади».

Шунингдек, «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деган Шавкат Мирзиёев.

Аввалроқ давлат раҳбари коронавирусдан эмас, йўллардаги авариялардан одамлар кўп ўлаётганини айтганди. Унда Президент «права»ни ўқимасдан олиш оддий ҳолга айланганини танқид қилган.

Шунингдек, Тошкентда трамвай фаолиятини тиклаш таклиф қилинганди.