Тошкентдаги Алишер Навоий кўчасида трамвай йўлларини ётқизиш ишлари бошлангани айтилди. Шаҳар ҳокимлиги ҳолат юзасидан маълумот берди.

Маълум қилинишича, Навоий кўчасида режали таъмирлаш ишлари олиб борилмоқда.

«2022 йилда Тошкент шаҳридаги кўчаларни тартибга келтириш (таъмирлаш) режасига мувофиқ, 14 февраль куни пойтахтимизнинг Навоий кўчасида таъмирлаш ишлари бошланди. Бу ишлар Тошкентда янги трамвай линияси ёки тезюрар автобус учун йўлак ташкил қилиш билан боғлиқ эмас», дейилади хабарда.

Қайд этилишича, бунда Навоий–Лабзак кўчасидан Навоий–Беруний кўчаларигача бўлган оралиқ буткул таъмирланиши режалаштирилган. Бу ишлар Тошкентда янги трамвай линияси ёки тезюрар автобус учун йўлак ташкил қилиш билан боғлиқ эмас.

«Тошшаҳартрансхизмат» акциядорлик жамиятининг «Bugun.uz»га маълум қилишича, ҳудуддаги ишлар трамвай йўли ётқизилиши учун амалга оширилмаяпти.

Аввалроқ Шавкат Мирзиёев Самарқандга қилган ташрифи давомида яқинда Тошкентда тезлик кўпи билан 60 км/соатгача белгилангани ҳақида қарор чиқишини маълум қилганди. Таъкидланишича, Президент Самарқандда янги қурилган ерости тоннели, йўлларни кўздан кечира туриб, хавфсиз йўл, хавфсиз пиёда концепциясини яратиш ҳақида сўзлаган ва шундай деган: «Яқинда Тошкентда тезлик кўпи билан 60 км/соатгача белгилангани ҳақида қарор чиқади».

Шунингдек, «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деган Шавкат Мирзиёев.