Самарқанд шаҳрида ҳайдовчилардан зўравонлик орқали пул ундириб келган жиноий гуруҳ қўлга олинди. Бу ҳақда вилоят Ички ишлар бошқармаси ахборот хизмати хабар берди.

Маълум бўлишича, шаҳарда яшовчи муқаддам жиноий жавобгарликка тортилган 7 нафар шахс Самарқанд–Навоий ва Самарқанд–Бухоро йўналишидаги ҳайдовчилардан зўравонлик йўли билан доимий таксичилик қилиш учун 300–500 доллар ундириб келган. Шунингдек, кунлик қатновчи ҳайдовчилардан 30 000–50 000 сўмгача таъмагирлик йўли билан пул олиб келинган.

Жиноий гуруҳ аъзоларининг фаолиятига қарши чиққан ёки сўралган пул маблағини бермаганларга нисбатан ёлланган бир гуруҳ спортчилар орқали жисмоний тазйиқ, зўравонлик ва оғир турдаги тан жароҳатлари етказиб келинган. Ўтказилган тезкор тадбирда гуруҳ етакчилари В.Ф. ва Э.Д.лар тадбирга жалб қилинган фуқароларга нисбатан товламачилик қилаётган вақтида жиноят устида қўлга олинган.

Ҳозирда мазкур ҳолат юзасидан В.Ф. ва Э.Д.ларга нисбатан Жиноят кодексининг тегишли моддалари билан жиноий иш қўзғатилган.

Аввалроқ Тошкент вилоятида тадбиркордан судланганлик ҳолатини олиб ташлаш учун 4000 доллар талаб қилган эркак қўлга олингани ҳақида хабар берилганди.