Жиззах шаҳрида тадбиркорга имтиёзли кредит олиб бериш эвазига 600 доллар талаб қилган солиқ катта инспектори ушланди. Бу ҳақда Иқтисодий жиноятларга қарши курашиш департаменти ахборот хизмати хабар берди.

Маълум бўлишича, Бош прокуратура ҳузуридаги департамент ҳамда Давдат хавфсизлик хизматининг вилоят бошқармалари томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Аниқланишича, Жиззах шаҳар Давлат солиқ инспекциясининг катта инспектори А.Х. «M.N.» МЧЖ раҳбари М.га 200 миллион сўм кредит ажратилишида ёрдам беришни ваъда қилган.

Солиқ ходими бунинг эвазига 600 доллар ва қайтариб бериш шарти билан 200 доллар олган вақтида ашёвий далиллар билан ушланган. Мазкур ҳолат юзасидан Жиноят кодексининг 168-моддаси (Фирибгарлик) ва 211-моддаси (Пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ Жиззахда таълим сифатини назорат қилиш бўлими бошлиғи пора билан қўлга олингани хабар қилинганди.