Фарғона вилояти Олтиариқ туманида 25 февраль куни массажхонада ёнғин содир бўлди. Бу ҳақда вилоят Фавқулодда вазиятлар бошқармаси матбуот хизмати хабар қилди.

Маълум бўлишича, 25 февраль куни соат 01:00 да Олтиариқ тумани Қизилтепа МФЙ Сиҳатгоҳ кўчаси 2-уйда жойлашган «Рўзихон-Зулпидинжон Орзуси» оилавий корхонасига қарашли массажхонанинг муолажа хонасининг 150 квадрат/метр майдонида ички ва том қисми ёнган. Содир бўлган ёнғинга ёнғин-қутқарувчилар соат 01:20 да етиб бориб, соат 01:25 да ёнғин ўраб олиниб, соат 02:15 да ўчирилган.

Хабарга кўра, ёнғиндан массажхонанинг 320 квадрат/метр майдони сақлаб қолинган. Ёнғин натижасида жароҳатланган ва ҳалок бўлганлар йўқ. Ҳозирда ёнғиннинг сабаби ва етказилган зарар миқдори аниқланмоқда.

Эслатиб ўтамиз, аввалроқ Жиззахда фойдаланишга топширилмаган кутубхонада, Тошкентдаги Янгиобод бозорида, Самарқанддаги уйларнинг бирида ҳамда Тошкентдаги омборхонада ёнғин содир бўлгани ҳақида хабар берилганди.