Украинанинг Львов шаҳридан Ўзбекистон фуқароларидан иборат навбатдаги гуруҳ 27 февраль куни Польша чегарасидаги Краковец–Карчова назорат-ўтказиш пунктига томон йўлга чиқди. Бу ҳақда Ташқи ишлар вазирлиги ахборот хизмати хабар берди.

Ўзбекистоннинг Украинадаги элчихонаси тақдим этган маълумотга кўра, шу вақтгача 600 дан зиёд Ўзбекистон фуқаролари Польша чегарасига етказилган. Элчихона вакилларининг маълум қилишича, Ўзбекистон фуқароларини эвакуация қилиш ишлари изчил давом этмоқда.

Шунингдек, «Bugun.uz»га Украина–Польша чегарасидаги вазият акс этган видео келиб тушди. Видео муаллифи Анвар Нарзуллаевга кўра, айни пайтда чегарадаги вазият барқарор. «Биринчи навбатда, Президентимизга миннатдорлик билдирамиз», — дейди у.

Эслатиб ўтамиз, Ўзбекистоннинг Украинадаги 90 нафар фуқародан иборат биринчи эвакуация гуруҳи 26 февраль куни Львовдан Краковец назорат-ўтказиш пункти йўналиши бўйлаб йўлга чиққанди.