USM Xolding асосчиси ва акциядори Алишер Усмонов Германия тортиб олаётган дунёдаги сиғими бўйича энг катта яхтага эгалик қилади. Миллиардер яхтани онаси шарафига «Dilbar» деб номлаган, Усмонов уни 600 миллион долларга сотиб олган.

Алишер Усмоновнинг 156 метрли яхтаси расман дунёдаги энг сиғимли яхта деб тан олинган. Кеманинг тоннажи 15 917 тоннани, ички биноларнинг умумий майдони эса 3800 квадрат/метрни ташкил этади. Яхтани 1875 йилда Бременда асос солинган Германиянинг «Lürssen» кемасозлик компанияси қурган бўлиб, компания мазкур яхта бир вақтнинг ўзида 40 нафаргача одамни сиғдира олишини айтган.

Ушбу кўрсаткич туфайли Алишер Усмоновнинг яхтаси рақибларини ортда қолдирган: бунгача Уммоннинг марҳум султони Қобус бин Саиднинг «Al Said» яхтаси (ялпи тоннажи 15 850 тонна) ва БАА президенти Шайх Халифа бин Зоид Ал Наҳаён оиласига тегишли Azzam (ялпи тоннажи 13136 тонна) дунёдаги энг катта сиғимли яхта ҳисобланган.

156 метрли яхтанинг дизайни «Espen Oeino» денгиз архитектура бюроси томонидан ишлаб чиқилган. Яхта ўзининг узунлиги бўйича Шайх Халифа бин Зоид Ал Наҳаённинг «Azzam» (180,6 метр), Роман Абрамовичнинг «Eclipse» (162,5 метр) ва Бруней шаҳзодасининг «Dubai» яхтасидан (162 метр) кейин дунёда тўртинчи ўринни эгаллаган.

Маълумотларга кўра, яхта қурилиши охирги дақиқаларгача сир тутилган ва лойиҳа «Omar» номи билан кемасозликда пайдо бўлган. У дизель-электр ҳаракат тизими туфайли соатига максимал 42 километр тезликка эриша олади.

Усмоновнинг яхтаси муаллифлик лойиҳаси бўйича 2016 йилда ишлаб чиқарилган, деярли 5 йил давомида қурилган. У яхталар тарихидаги энг катта сузиш ҳавзаси, иккита вертолёт майдончаси, сауна, кинотеатр ва лифт билан жиҳозланган.

Сўнгги маълумотларга кўра, Германия ҳукумати Гамбургда Европа Иттифоқи санкциялари остида қолган россиялик миллиардер Алишер Усмоновнинг «Dilbar» яхтасини мусодара қилган. Кейинчалик ОАВда тарқалган мазкур маълумот рад этилган.