Видео: Наманганда «Ёшлар дафтари»га киритилган болага эски ва ичида беҳаё фильмлар бўлган ноутбук берилгани айтилди
Ёшлар ишлари агентлиги директори ҳолат юзасидан муносабат билдирди
Наманган шаҳрида «Ёшлар дафтари»га киритилган Довудхон Ғуломжоновга эски ноутбук берилгани ва унинг ичидан беҳаё кинолар борлиги айтилган хабарлар ижтимоий тармоқларда тарқалди. Ёшлар ишлари агентлиги директори ҳолат юзасидан муносабат билдирди.
Маълум қилинишича, ушбу ҳолат зудлик билан ўрганилиб, ўша вақтнинг ўзида ноутбук харид қилинган тадбиркор билан алоқага чиқилган.
«Вакилларимиз Довудхон ва таъминотчи тадбиркор билан билан учрашиб, совға қилинган нотубукни текшириб кўрганда тадбиркор ноутбукнинг янги эканини, ундаги фильм ҳеч қандай беҳаё фильм бўлмаганини ва ноутбукнинг созлигини текшириб кўриш мақсадида фильм жойланганини билдирган», — дейди агентлик директори.
Қайд этилишича, Довудхон ушбу ноутбукни эски ва беҳаё фильм жойлаштирилган деб ўйлаб, ижтимоий тармоқларга тарқатган.
«Вакилларимиз Довудхонга берилган ноутбукни бошқа бир янги ноутбукка алмаштириб берди. Видеода барчасини батафсил тушуниб олишингиз мумкин! Ижтимоий тармоқ фаолларидан бундай мурожаатларни аввал Ёшлар ишлари агентлигига жўнантиб, вазиятга аниқлик киритганларидан сўнг тарқатишларини сўраймиз!» — дея қўшимча қилган агентлик директори.
Аввалроқ Самарқанд вилояти Нуробод туманида IТ мусобақасида ғолиб бўлган 13 ёшли мактаб ўқувчисига эски ноутбук берилгани, бунинг ортидан туман «замҳокими» ҳайфсан олгани, сўнг ўқувчига янги ноутбук совға қилингани ҳақида хабар берилганди. Шунингдек, Наманган вилояти Норин туманида математика бўйича онлайн олимпиадада 1-ўринни эгаллаган ўқувчи унга соврин сифатида берилган ноутбук қайтариб олиб қўйилгани ҳақида видеомурожаат йўллади. «Bugun.uz» ҳолатга аниқлик киритиш мақсадида туман ҳокимлиги матбуот хизмати билан боғланганди.
