Қорақалпоғистоннинг Беруний туманида тиктокер қиз «Мўътабар она» ҳайкали олдида «тренд»га чиқди. Туман ҳокимлиги ушбу ҳолат юзасидан муносабат билдирди.

Маълум қилинишича, тумандаги «Мўътабар она» ҳайкали ва урушда ҳалок бўлган аскарлар хотирасига ўрнатилган рамзий ҳайкаллар олдида берунийлик тиктокер қиз видео олган ва ижтимоий тармоққа жойлаган.

Туман ҳокимлиги томонидан олиб борилган тезкор ўрганиш натижасида видео муаллифи Умида Абдуллаева экани аниқланган.

Қайд этилишича, тиктокер қиз шахсини яшириб ўтирмасдан қилган иши учун узр сўраган. Айни вақтда Умида видеони TikTok ва Instagram тармоқларидан ҳам ўчириб ташлаганини билдирган.

Аввалроқ Самарқандда Алишер Навоий ҳайкалининг оёғига тупурган йигитга чора кўрилганди. Шунингдек, Алишер Навоий ҳайкали олдида ноўрин ҳаракатлар содир этган йигит қамалганди.