Андижон вилояти Қўрғонтепа туманида 8 март куни 16 ёшли қиздан пул талаб қилган эркак ушланди. Бу ҳақда Ички ишлар вазирлиги ҳузуридаги Тергов департаменти ахборот хизмати хабар берди.

Маълум бўлишича, 16 ёшли Ғ.Г. исмли қиз «SIM» картасини йўқотиб қўйган, уни топиш мақсадида рақамига қўнғироқ қилган. 25 ёшли Қ.А. карта ўзида экани ва ушбу рақамга уланган Telegram мессенжерини очиб, сир сақланиши лозим бўлган маълумотларни юклаб олганини айтган.

Шу билан бирга, эркак маълумотларни тармоқларда тарқатиб юбормаслик учун 400 минг сўм талаб қилган. Туман ИИБ Жиноят қидирув бўлими ходимлари томонидан тадбир ўтказилган. Унда товламачилик йўли билан Ғ.Г.дан талаб 200 минг сўмни олган вақтида ушланган.

Мазкур ҳолат бўйича Қўрғонтепа туман ИИБ ҳузуридаги тергов бўлинмаси томонидан Қ.А.га нисбатан Жиноят кодексининг 165-моддаси (Товламачилик) 1-қисми билан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Тошкентда Telegram’да аёл номидан профиль очиб, товламачилик қилган йигит ушлангани хабар қилинганди.