Наманган вилоятининг Янгиқўрғон туманида «Заковат» интеллектуал ўйини ғолибларига ваъда қилинган совғалар берилмагани айтилди. Ёшлар ишлари агентлигининг вилоят бошқармаси ҳолатга ойдинлик киритди.

Ваъда қилинган совғалар берилмагани айтилган видеога кўра, Зарбдор маҳалласида «Заковат» танлови ўтказилган ва бош совринга 10 та «iPhone 13 Pro Мах» қўйилган. Лекин унинг ўрнига «Телевизор олиб туринглар, телефонларингизни кейин олиб келиб берамиз», — дейилган. Ғолиблар эса телевизорларни олмаган.

Ёшлар ишлари агентлигининг вилоят бошқармаси эса ҳолатни ўрганиб чиқиб, ҳодиса қаҳрамонлари билан суҳбатлашган. Унга кўра,  Зарбдор маҳалласи жамоаси вакиллари «Заковат» ўйини ғолиблари учун бериладиган мукофотлар ҳақидаги Telegram’да тарқалган норасмий, фейк маълумотларга ишониб қолганини маълум қилган. Келтирилишича, айнан шу туфайли тушунмовчилик келиб чиққан.

Аввалроқ Наманганда «Ёшлар дафтари»га киритилган болага эски ва ичида беҳаё фильмлар бўлган ноутбук берилгани айтилганди. Шунингдек, Самарқанд вилояти Нуробод туманида IТ мусобақасида ғолиб бўлган 13 ёшли мактаб ўқувчисига эски ноутбук берилгани, бунинг ортидан туман «замҳокими» ҳайфсан олгани, сўнг ўқувчига янги ноутбук совға қилингани ҳақида хабар берилганди.