Хайрли кеч, ушбу ўқиб турганингиз — «Бугун»нинг Наврўз байрамида эълон қилинган муҳим хабарларни ўз ичига олган махсус «Наврўз оқшоми» дайжести.

Бугун — ўзгача кун («Бугун» эса ҳар доим ўзгача), чунки айнан шу куни кунни ҳам, тунни ҳам бир хил вақт яшаймиз. 21 март кун ва тун бир хил бўладиган кун. Бу асосийси эмас, муҳими — бугун Наврўз. Шарқона Янги йил нафақат Ўзбекистонда, балки қўшни давлатлар ва баъзи шарқий мамлакатларда, хусусан, Эронда алоҳида эътибор билан нишонланади.

Кўпдан бери худди бугунгидек (булутли, совуқ) ҳавода байрам нишонлашга ўрганиб қолган бўлсакда, бу йил ҳам айни ҳавода Наврўзни кутиб олиш бироз ранжитиши мумкин, лекин сиз бунга эътибор бермасликка ҳаракат қилинг. Байрамни оила аъзоларингиз, яқинларингиз билан нишонланг (шундай қилдингиз, деган умид ҳам бор), кайфиятни кўтаринг, совғалар улашинг, хуллас, байрам қилинг. Чунки бу ҳаволар эртами кечми ўтади, аммо бугун қайтмайди. Яна Наврўз келар (эҳтимол, яхши ният қилинг), лекин 2022 йилда бошқа бу кун бўлмайди — бугун билан яшанг. «Бугун»да қолинг (бу гапни дайжестнинг охирида ёзардик, лекин бугун, айтганимиздек, ўзгача кун). Байрамингиз муборак бўлсин!

Шу жойига озроқ тилак: осмонимиз мусаффо бўлсин (охирги бир ойда Украинада содир бўлган воқеалардан кейин «мусаффо» сўзининг қадри яна бир карра ошди), сув, ўт ва баъзи бошқа давлат раҳбар(лар)и балосидан Ўзи асрасин.

Ўзбекистоннинг деярли барча ҳудудларида байрам сайллари бўлиб ўтди (ўтяпти). Шу жумладан, Тошкентда ҳам. Сайлларнинг пойтахтдагисида Президент ҳам иштирок этди. Бу сафарги шодиёна «Humo arena» мажмуаси ва уни атрофида ўтди. Унда Шавкат Мирзиёев нутқ сўзлаб, барчани байрам билан қутлади.

Шавкат Мирзиёев халқни табриклаган бўлса, уни Владимир Путин байрам билан табриклади. Икки давлат раҳбарлари телефон орқали суҳбатлашди. Суҳбат аввалида Россия президенти давлат раҳбари ва Ўзбекистоннинг кўп миллатли халқини баҳор ва янгиланиш байрами — Наврўз билан самимий табриклаб, фаровонлик ва равнақ тилаган.

Бу ҳаммаси эмас, сиёсат ҳам қолиб кетмаган, аксинча, асосий мавзу бўлган. Етакчилар икки мамлакат ўртасида ўрнатилган дипломатик муносабатлар ўрнатилганининг 30 йиллиги билан ҳам бир-бирини қутлаган.

Шунингдек, Россиянинг нуфузли делегацияси шу ҳафта пойтахтда бўлиб ўтадиган Тошкент Халқаро инвестиция форуми ишида иштирок этиши кутилмоқда. Мулоқотда савдо, инвестициялар, саноат кооперацияси каби муҳим соҳаларда, шу жумладан Ўзбекистон ва Россия ҳудудларининг етакчи корхоналарини жалб қилган ҳолда кўп қиррали икки томонлама ҳамкорликни янада ривожлантириш ва мустаҳкамлаш истиқболлари муҳокама қилинган.

Кинотавсия

Медиа майдонни эгаллаган асосий мавзулардан чарчагансиз. Байрам муносабати билан ушбу мавзуларни бир зумга унутиш учун сизга беш фильм тавсия қиламиз. Бу фильмлар дунё кино рейтингларида юқори ўринларда турмайди. Лекин байрам кунлари кўришга арзийди, руҳий ҳордиқ беради. Қолаверса, ҳозирги мавзуларга алоқадорлиги ҳам бор. Гарчи бу фильмларда умуман бошқа жамиятларда бўладиган воқеалар тасвирланган бўлсада, сизни таққос ва қиёсга ундайди. Хуллас, байрам кунлари маза қилиб кўришга арзийдиган бешта фильмни тавсия қиламиз. «Парадизо» янги кинотеатри, «Кетма-кетликда», «Ёмғир», «Қуёнча Жожо» ва «Пикей» фильмларини ўз ичига олган тўпламни ҳар бирига тегишли тақрини бу ерда ўқишингиз мумкин.

Хўш, оламда нима гап?

Қўшни президентлар: Туркманистоннинг янги раҳбари кўчат экди, Садир Жапаров эса рафиқаси билан сумалак тайёрлашда иштирок этди.

Туркманистонда 20 март куни президент Сердар Бердимуҳамедов иштирокида Наврўз байрами муносабати билан кўчат экиш акцияси бошланди. Aкция Ашхободнинг Берқарарлиқ туманида бўлиб ўтган. Мамлакат президенти Сердар Бердимуҳамедовни Халқ Маслаҳати Миллий Генгеш раиси, ҳукумат аъзолари, вазирлик ва идоралар вакиллари кутиб олган.

Туркманистон президнети олдига ёш бола келиб унга мустаҳкам соғлик, улкан муваффақиятлар тилаб, кўчат экиш акциясини бошлашни сўраган. Сердар Бердимуҳамедов шу тариқа акцияга старт бериб, болага эсдалик соғаси топширган.

Қирғизистон президенти Садир Жапаров ва рафиқаси Ойгул Жапарова куни Боткен вилоятида сумалак тайёрлаш жараёнида иштирок этди. Жапаров амалий ташриф билан Боткен вилоятига борган ва ташриф давомида Наврўз таоми тайёрланишида қатнашган.

Президент гулхан атрофида оқсоқоллар ва маҳалла фуқаролари билан суҳбатлашган. Шунингдек, сумалакни аралаштириб, анъанага кўра тилак билдирган.

«Эй Яратган! Халқимизга бахт, мурувват бер. Йил баракали бўлсин. Ер, эл обод бўлсин. Энг муҳими, тинчлик бўлсин!» — дейди Қирғизистон президенти.

Дайжестнинг байрам сонига негатив қўшмоқчи эмасмиз, шу сабабли бошқа хабарлар пунктларда:

• Хитойда бортида 133 нафар йўловчи бўлган самолёт қулаб тушди, ҳалок бўлганлар ҳақида маълумот ҳалича йўқ;
• Зеленский Исроил парламентида нутқ сўзлади. У нутқида Россияга қарши санкцияларнинг йўқлигини танқид қилиб, Украинага қарши урушни Иккинчи жаҳон уруши билан қиёслаган.

Бугун билан яшанг. «Бугун»да қолинг. Яна бир бор Наврўзингиз муборак бўлсин!