Президент 18 март куни «Юридик хизмат кўрсатиш марказлари фаолиятини янада кенгайтириш бўйича қўшимча чора-тадбирлар тўғрисида»ги қарорни қабул қилди.

Қарорга мувофиқ, 2022 йил 1 августдан босқичма-босқич Юридик хизмат кўрсатиш марказлари томонидан туман даражасидаги қуйидаги идораларга юридик хизмат кўрсатилади:

• маҳалла ва нуронийларни қўллаб-қувватлаш бўлими;
• қишлоқ хўжалиги бўлими;
• туризм ва маданий мерос бўлими;
• спортни ривожлантириш бўлими;
• оила ва хотин-қизлар бўлими;
• давлат солиқ инспекцияси;
• аҳоли бандлигига кўмаклашиш маркази;
• давлат умумий ўрта таълим мактаблари;
• давлат мактабгача таълим ташкилотлари;
• давлат кўп тармоқли марказий ва оилавий поликлиникалар.

2022 йил 1 майгача E-huquqshunos электрон тизимини техник жиҳатдан қўллаб-қувватлаш ва маслаҳатлар бериб бориш мақсадида Сall-марказ ташкил қилинади.

2022 йил 1 декабргача вилоят даражасидаги давлат органлари ва ташкилотлари ҳамда ҳокимликларга марказлар томонидан юридик хизмат кўрсатилишини йўлга қўйиш бўйича таклифлар ишлаб чиқилади.

Аввалроқ Ўзбекистоннинг барча туман-шаҳарларида юридик хизмат кўрсатиш марказлари очилиши ҳақида хабар берилганди. Шунингдек, кекса ва ногиронларга давлат хизматларини кўрсатиш соддалаштирилиши маълум қилинган.