Андижон шаҳрини электр энергияси билан таъминловчи 110 киловатли ҳаво тармоғига 23 март куни яшин тушди. Бу ҳақда вилоят «Ҳудудий электр тармоқлари» акциядорлик жамияти ахборот хизмати хабар берди.

Маълум бўлишича, ҳаво тармоғига кучли ёғингарчилик ҳамда яшин тушиши оқибатида шаҳарнинг айрим ҳудудларида фавқулодда электр энергияси узилиши кузатилди.

Ҳозирда тезкор чиқиш гуруҳи томонидан носозликни таъмирлаш ишлари олиб борилмоқда. Жамият ҳолат юзасидан қўшимча маълумот берилишини маълум қилди. «Келтирилган ноқулайликлар учун истеъмолчилардан узр сўраймиз», дейилади хабарда.

Шунингдек, Энергетика вазирлиги таъмирлаш ишлари якунлангандан сўнг электр таъминоти қисқа фурсатда қайта тикланишини маълум қилди.

Эслатиб ўтамиз, Андижон вилоятида бу ҳолат 17 ноябрь куни ҳам кузатилганди. Вилоятнинг барча ҳудудида ҳаво ҳарорати кескин совиб кетиши ҳамда кучли шамол оқибатида электр энергияси таъминотида узилишлар юз берган.