Ўзбекистон Россия билан темир йўл қатновини тиклаши мумкин
Ўзбекистон апрель ойидан Россия билан йўловчи темир йўл қатновини тикламоқчи. Бу ҳақда транспорт вазири Илҳом Маҳкамов Тошкентдаги биринчи халқаро инвестиция форумида маълум қилди.
Вазирнинг сўзларига кўра, 2020 йил март ойида пандемия туфайли тўхтатилган йўловчи поездлари ҳаракатининг қайта тикланиши жуда долзарб ҳисобланади.
«Биз ҳозир Россиядаги ҳамкасбларимиз қатнов учун рухсат беришини кутмоқдамиз. Прогнозлар бор, 1 апрелдан темир йўл қатнови тикланишини мумкин. Фақатгина ҳаво қатновига эътибор қаратиш нотўғри, чунки ҳозир темир йўл қатновига муҳтож одамларнинг контингенти каттадир», — дейди Илҳом Махкамов.
Аввалроқ Россия Қозоғистон билан қуруқлик чегарасидаги чекловларни олиб ташлагани маълум қилинганди. Ушбу ўзгаришдан сўнг Ўзбекистондан автобус ёки енгил машинада Россияга етиб олиш имконияти ҳам тикланиши мумкин.
