Тошкентда бир нечта фуқаролар бошқа фуқаролар томонидан «самосуд» қилингани, ўзбошимчалик билан сўроққа тутилгани ҳақида маълум қилинди. Шаҳар Ички ишлар бош бошқармаси ҳолат юзасидан маълумот берди.

Аниқланишича, ҳолатлардан бири Бектемир туманида содир бўлган. Фуқаролар 1990 йилда туғилган П.С. ва 1991 йилда туғилган К.Ф. 2022 йилнинг 18 март куни 2003 йилда туғилган А.Р.ни дўконларига харидор сифатида кириб, дўкон ходимлари харид қилинган маҳсулот учун тўлов варақаси (чек)ни бермагани юзасидан ушбу дўконларнинг «QR-кодини» сканер қилиб «Солиқ ҳамкор» саҳифасига юборгани учун турли сўзлар билан ҳақорат қилган.

Бундан ташқари, 20 март куни Сергели туманида бир нечта фуқаролар 1997 йилда туғилган Л.Ф.ни дўкон ходимлари харид қилинган маҳсулот учун тўлов варақаси (чек)ни бермагани бўйича маълумотларни солиқ идораларига бераётганликда айблаган. Сўнг фуқаролар 1984 йилда туғилган Д.Ғ., 1998 йилда туғилган Х.А., 1983 йилда туғилган У.Л., 1981 йилда туғилган Н.Н., 1990 йилда туғилган Х.С. ва бошқалар Л.Ф.ни турли сўзлар билан ҳақоратлаб, шовқин кўтариб, жамоат тартибини бузган.

Қайд этилишича, ҳозирда ушбу фуқароларга нисбатан Маъмурий жавобгарлик тўғрисидаги кодекснинг 41-модда («Ҳақорат қилиш»), 183-модда («Майда безорилик»), 200-модда («Ўзбошимчалик»)лари билан маъмурий баённома расмийлаштирилган.

Аввалроқ Самарқандда ҳақоратли видео тарқатган эркакни бир гуруҳ фуқаролар «самосуд» қилмоқчи бўлганди. Шунингдек, Тошкент вилоятида сойда чўмилаётган аёл «самосуд» қилингани ва Тошкентда 4 аёл ижарадаги шеригини «самосуд» қилгани хабар қилинган.