Сирдарё вилояти Сайхунобод туманида 18 март куни «Lacetti» йўл-патруль хизмати ходимларидан қочиб, хизмат машинасига шикаст етказди ва чуқурга тушиб кетди. Вилоят Ички ишлар бошқармаси ҳолат юзасидан муносабат билдирди.

Қайд этилишича, шу куни ҳамкор ташкилотлар тезкор тадбир асосида давлат рақам белгиси ечиб қўйилган «Lacetti»ни тўхтатиб, текширмоқчи бўлган. Ҳайдовчи эса ходимларнинг талабига бўйсунмай, машинасини ҳайдаб кетган.

«Lacetti» бироз юргач 20 716 VSF давлат белгили хизмат автомашинасига шикаст етказган ҳолда ЙПХ маскани ёнида жойлашган пастликка тушиб тўхтаган. Автомашинада бўлган шахслар ҳуқуқни муҳофаза қилувчи орган ходимлари томонидан ушланган.

Машина холислар иштирокида кўздан кечирилганда, кўп миқдордаги таркибида кучли таъсир қилувчи ҳамда гиёҳвандлик моддаси бўлган дори воситалари борлиги аниқланиб, далилий ашё сифатида олинган. Ҳозирда ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, Тошкент шаҳри Миробод туманида 16 март куни «Cobalt» каналга тушиб кетганди. Шунингдек, Тошкент метрополитенининг «Шаҳристон» бекатига «Spark» тушиб кетгани ҳақида хабар берилганди.