«Инсон ҳуқуқлари бўйича Ўзбекистон Республикаси Миллий маркази фаолиятининг моддий-техника таъминотини янада яхшилаш тўғрисида»ги Президент қарори қабул қилинди. Бу ҳақда Адлия вазирлиги ахборот хизмати хабар берди.

Ҳужжат билан Инсон ҳуқуқлари бўйича Ўзбекистон Миллий марказида Инсон ҳуқуқлари бўйича ахборот-кутубхона маркази – Инсон ҳуқуқлари уйи ташкил этилди. Шунингдек, марказга қуйидаги қўшимча вазифалар юклатилди:

• инсон ҳуқуқлари соҳасида илмий-ҳуқуқий базани тизимлаштириш, ўқув, илмий-услубий ва оммабоп нашрлар ҳамда халқаро шартномаларнинг давлат тилидаги тўпламлари доимий чоп этилишини таъминлаш;
• инсон ҳуқуқларини таъминлашга оид ислоҳотларнинг хронологиясини юритиш, фуқаролар ва илмий тадқиқотчиларга инсон ҳуқуқлари бўйича тизимлашган илмий-ҳуқуқий манбалардан фойдаланиш учун кенг имкониятлар яратиш.

Аввалроқ Шавкат Мирзиёев БМТ махсус маърузачиси билан инсон ҳуқуқлари ва асосий эркинликларини муҳокама қилгани ҳақида хабар берилганди.