Президент соғлиқни сақлаш соҳаси ва «Яшил макон» умуммиллий лойиҳаси юзасидан видеоселектор ўтказиши ҳақида хабар берилганди. Давлат раҳбари йиғилишда апрель ойида тиббиёт соҳасида амалга ошириш зарур бўлган ишларга тўхталиб ўтди.

Шавкат Мирзиёевнинг сўзларига кўра, биринчи масала — тиббиёт соҳаси вакиллари билан очиқ мулоқотда берилган топшириқлар ижросини апрель ойида ташкил этиш. Давлат раҳбари ўтган ҳафта алоҳида фармойиш имзоланиб, 7 та йўналишдаги 50 та тадбир ва уларнинг ҳар бири учун масъуллар белгиланганини таъкидлади.

«Халқимизга айтган ҳамма ташаббусларимиз бўйича қарорлар тез кунларда қабул қилинади. Лекин амалий ижрони бир кун ҳам кечиктириб бўлмайди. Шунинг учун бир ойлик амалий иш тизимига ўтамиз. Вазир, ихтисослашган марказ раҳбарлари ва ҳокимлар ўзларининг ойма-ой режасини ишлаб чиқиб, амалга оширади. Ушбу раҳбарларнинг апрель ойи учун иш режалари билан танишиб чиқдим.

Қорақалпоғистон, Андижон, Сурхондарё ҳамда Кардиология ва Хирургия марказлари масаланинг сал бўлсаям ичига кирган. Лекин қолган марказларнинг ҳам, ҳудудларнинг ҳам иш режаси ‘шаблон’ кўринишида. Бирортаси туман даражасида нима иш қилишини олдига вазифа қилиб қўймаган», — деган Президент.

Давлат раҳбари мавзуни давом эттирган.

«Мисол учун, Урология ва Онкология марказлари апрель ойида вилоятларда бор-йўғи 5 тадан, Акушерлик ва гинекология маркази эса 15 та юқори технологик операция ўтказишни режа қилган. Ёки Кўз микрохирургияси маркази ходимлари ҳар ойда жойига чиқиб 50 тадан операция ўтказгани билан, апрелда ҳудудга борганда атиги 3 нафар мутахассиснинг малакасини оширмоқчи. Барча марказлар раҳбарларини қатъий огоҳлантираман. Агар:

• ўзи бошчилигида жойларга чиқиб, янги даволаш амалиётларини ўтказмаса;
• юқори технологик операцияларни ҳудудларда жорий этмаса;
• вилоят ва туман мутахассисларини бунга ўргатмаса, ўзгариш бўлмайди. Одамларимиз сарсон бўлиб, пойтахтга келаверади».

Шу боис апрель марказлар раҳбарлари учун чинакам синов ойи бўлиши, масаланинг моҳиятига кириб, ўз иш фаолиятини ўзгартирмаган раҳбарларга қатъий чоралар кўрилиши кўрсатиб ўтилган.

Президентнинг айтишича, апрель ойида:

• 1 миллион нафар хавф гуруҳига кирувчи, 700 минг нафар бола ва 100 минг нафар ҳомиладор аёл мақсадли скринингдан ўтказилади;
• ҳар бир оилавий поликлиникада кундузги стационарларни ташкил этиш орқали туман ва шаҳар шифохоналарига ётадиган беморларнинг навбати камида 20 фоизга қисқартирилади;
• 26 та оилавий шифокорлик пункти тўлиқ таъмирланди, зарур штатлар, асбоб-ускуна ва дорилар билан таъминланади.

Умуман, йил якунига қадар жами 400 та маҳалла учун бундай пунктлар очилиши таъминланади. Шунингдек, апрель ойида олис ҳудудларда махсус контейнерлардан фойдаланган ҳолда 1 минг 700 та маҳалла тиббиёт пунктини ташкил этиш вазифаси қўйилган.