Андижон шаҳрида 29 март куни кучли шамол сабаб дарахт «Nexia-3»ни босиб қолди, «Spark»нинг олд ойнасига зарар етказди. Бу ҳақда вилоят ҳокимлиги хабар бермоқда.

Андижон шаҳар фавқулодда вазиятлар бўлими тезкор навбатчи диспетчер хизматига келиб тушган маълумотга кўра, шамол кучайиши оқибатида соат 13:20 да Бўстон даҳаси Усмон Юсупов кўчасида йўл четидаги дарахт ағдарилган. У «Nexia-3» автомашинасининг олд қисмини босиб қолган. Шунингдек, ҳодиса оқибатида «Spark» автомашинасининг олд ойнасига зарар етган. Тан жароҳати олган фуқаролар йўқ.

Шу муносабат билан Андижон вилояти Фавқулодда вазиятлар бошқармаси огоҳлантириш эълон қилган.

«Азиз юртдошлар! Содир бўлаётган кучли шамол сабаб айрим ҳудудларда дарахтлар синиб, автомашиналар ҳамда фуқароларга зарар етказиш ҳолатлари учраб турибди. Бу каби нохуш вазиятларни инобатга олган ҳолда шахсий ва мол-мулкингиз хавфсизлигини асраш мақсадида зарур эҳтиёткорлик чораларини кўришингизни сўраймиз», дейилган унда.

Аввалроқ Термизда ҳам кучли шамол сабаб дарахт автомобиль устига қулаган эди. Шунингдек, Сирдарёда кучли шамол кўп қаватли уйнинг том қисмини учириб юборган.