Ўзбекистонда футбол ва мини-футбол бўйича Давлат хавфсизлик хизмати раиси кубогига старт берилди.

Маълум бўлишича, ушбу мусобақа апрель–август ойларида ўтказилади. Кубок 3 босқичда ўтказилади:

• • I босқич – туман саралаш мусобақалари 2022 йилнинг апрель-май ойларида;
  • II босқич – Қорақалпоғистон Республикаси, Тошкент шаҳри ва вилоятлар бўйича саралаш мусобақалари июнь-июль ойларида;
  • III босқич – республика бўйича финал мусобақалари август ойида ўтказилади.

Аввалроқ 2021 йилнинг июнь ойида Давлат хавфсизлик хизмати раисининг кубоги учун «Бунёдкор» стадионида мини-футбол бўйича мусобақа ўтказилгани хабар қилинганди. 2021 йилнинг апрель ойидан бошлаб ҳар бир ҳудудда мини футбол бўйича ДХХнинг Қорақалпоғистон Республикаси, вилоятлар ҳамда Тошкент шаҳар бошқармалари бошлиқлари кубоги ўтказилган. Унда 18–30 ёш оралиғидаги ёшлардан иборат 7779 та жамоа муносиб иштирок этган.

Хусусан, туман, шаҳар ҳамда вилоят босқичларида ғолибликни қўлга киритган энг кучли 14 та жамоа 12–15 июнь кунлари пойтахтдаги «Бунёдкор» стадионида кубок учун ўзаро куч синашган. Қуръа натижасига кўра, жамоалар тўрт гуруҳга бўлинган.

Якуний натижаларга кўра, 1-ўринни Қашқадарё вилояти Қамаши тумани Самарқанд МФЙ жамоаси, 2-ўринни Сирдарё вилояти Гулистон шаҳри Тараққиёт МФЙ жамоаси, 3-ўринни Жиззах вилояти Зомин тумани Ғофур Ғулом МФЙ жамоаси ва 4-ўринни Қорақалпоғистон Республикаси Нукус тумани Оқ Манғит МФЙ жамоаси қўлга киритган.