Андижон вилояти Избоскан туманида бир қоп буғдой туфайли бошланган оилавий жанжал ўлим билан якун топди. Вилоят суди матбуот хизматининг «Bugun.uz»га маълум қилишича, укасининг ўлимига сабаб бўлган К.Б. спиртли ичимлик таъсирида бу жиноятни содир этган.

Аниқланишича, ҳудуддаги фермер хўжаликларидан бирида мироб бўлиб ишловчи 57 ёшли К.Б. укаси И.Б.нинг уйига кириб, ўзига тегишли ҳамда аввалдан сақлаб келинаётган буғдойнинг бир қопини олиб чиқиб сотмоқчи бўлади. Шу вақт кўчадан велосипед етаклаб кириб келган укаси акасидан буғдойни жойига қайтариб қўйишини сўраган. К.Б. укасининг талабини рад этиб, буғдойни ёзда фермер хўжалигида ишлаб топган иш хақи эвазига олганини, шу боис хоҳласа сотишини маълум қилган.

Ака-ука ўртасида жанжал юзага келиб, К.Б. зинада турган пичоқни И.Б.нинг кўкрак қафасига тиққан. Кўрсатилган тиббий ёрдамга қарамай, И.Б. шифохонага етиб бормай, йўлда вафот этган. Жиноят ишлари бўйича Хўжаобод тумани судида бўлиб ўтган суд мажлисида К.Б. жиноятни қасддан содир этмаганини таъкидлаган.

«Укам мени бир неча марта ургач, қон босимим пасайиб, қаршилик қилишга кучим етмай қолди. Унга пичоқни кўрса яқинлашмайди, деб ўйлаб, пўписа қилмоқчи бўлгандим, холос. Бироқ кутилмаганда шу иш содир бўлди. Тўғри, шу куни далага сув қўйиш учун чиқиб кетаётиб, бир пиёла вино ичганман. Аммо укамни ўлдириш ниятим бўлмаган, унинг уйига пичоқ ҳам олиб бормаганман, қилмишимдан қаттиқ пушаймонман», — деб кўрсатма берган судланувчи.

Жиноят ишини кўриб чиққан судья Аҳмад Назирбековнинг қайд этишича, суд К.Б.га жазо тайинлашда унинг пушаймонлигини, илгари судланмаганини, кекса ёшда экани, оилавий шароити оғирлигини жазони енгиллаштирувчи, жиноятни спиртли ичимлик истеъмол қилиб маст ҳолатда ғаразли ва паст ниятларда содир этганини эса оғирлаштирувчи ҳолатлар деб ҳисоблаб, 8 йилга озодликдан маҳрум қилиш ҳақидаги тўхтамга келган.

Шунингдек, мазкур ҳукм билан судланувчидан жабрланувчи, яъни марҳумнинг рафиқаси фойдасига 6 миллион сўм моддий, 15 миллион сўм маънавий зарар ундирилиши белгиланган.

Аввалроқ Андижонда 53 ёшли эркак танишини пичоқлаб ўлдиргани хабар қилинганди. Шунингдек, Наманганда 35 ёшли эркак собиқ синфдошини пичоқлаб ўлдирган.