Тошкент вилояти Зангиота тумани ҳокимининг собиқ ўринбосари қидирувга берилди. Бу ҳақда Бош прокуратура матбуот котиби Ҳаёт Шамсутдинов «Bugun.uz»га маълум қилди.

Таъкидланишича, Зангиота тумани ҳокимияти мансабдор шахслари ва бошқаларга нисбатан Жиноят кодексининг 167 (Ўзлаштириш ёки растрата йўли билан талон-торож қилиш) ва бошқа моддалари билан қўзғатилган жиноят иши юзасидан тергов ҳаракатлари олиб борилмоқда.

Жиноят иши доирасида Зангиота тумани ҳокимининг собиқ ўринбосари Ж.У.га кодекснинг 167, 205 (Ҳокимият ёки мансаб ваколатини суиистеъмол қилиш) ва 209-модда (Мансаб сохтакорлиги)лари билан айблов эълон қилиниб, сиртдан қамоққа олиш эҳтиёт чораси қўлланилган ҳамда қидирув эълон қилинган.

Маълумот учун, у 2022 йил 10 январь куни саноатни ривожлантириш капитали қурилиш, коммуникация ва коммунал хўжалик масалалари бўйича ўринбосар вазифасини бажарувчи лавозимидан озод этилганди.

Аввалроқ Тошкент давлат иқтисодиёт университетининг собиқ проректори қидирувга берилганди. Шунингдек, Тошкентда ўта оғир жиноят содир этган эркак қидирувга берилгани маълум қилинган.