Андижон шаҳридаги мактабларнинг бирида ҳижобли ўқувчилар мактабга киритилмагани ҳақида хабарлар тарқалди. «Bugun.uz» ҳолатга аниқлик киритиш мақсадида вилоят Халқ таълими бошқармаси матбуот хизмати билан боғланди.

Ижтимоий тармоқларда Андижондаги 6-мактабда ҳижоб кийган ўқувчилар мактабга киритилмагани акс этган видео тарқалди. Вилоят ХТБ мазкур воқеа 2021 йилнинг сентябрь ойида содир бўлгани ва бу бўйича тушунтириш берилганини маълум қилди.

Муносабатда келтирилишича, мактаб маъмуриятига одоб-аҳлоқ қоидаларига риоя этган ҳолда тушунтириш ишларини олиб бориш тўғрисида огоҳлантириш берилган.

«Андижон шаҳар халқ таълими бўлими ишчи гуруҳи томонидан ҳолат ўрганилганда мактаб жамоаси томонидан ўқувчилардан Вазирлар Маҳкамасининг 666-сонли қарори билан тасдиқланган низомнинг 7-банди асосидаги мактаб формасида келиши талаб этилгани аниқланди.

Ҳолат юзасидан ишчи гуруҳ томонидан мактаб маъмуриятига мазкур қарордаги миллий қадриятларимизни инобатга олган ҳолда қизларимиз учун истисно тариқасида мактабда оқ ва очиқ рангларда миллий рўмол (бошнинг орқа томонига ўралган ҳолатда) ва дўппида бўлишларига рухсат этилганлиги тушунтирилиб, мактаб маъмуриятига одоб-аҳлоқ қоидаларига риоя этган ҳолда тушунтириш ишларини олиб бориш тўғрисида огоҳлантириш берилди», — дейилади хабарда.

Аввалроқ Гулистон давлат университетига ҳижобли талабалар киритилмаётгани ҳақида тарқалган хабарлар юзасидан маълумот берилганди.