Самарқандда хусусий боғча тарбияланувчиси калтаклангани ҳақида хабар берилганди. Мактабгача таълим вазирлигининг «Bugun.uz»га маълум қилишича, уни урган тарбиячи билан тузилган меҳнат шартномаси бекор қилинди.

Таъкидланишича, ижтимоий тармоқларда тарқатилган маълумотлар юзасидан ўрганиш ишлари олиб борилган. Унга кўра, Самарқанд тумани Бухорий МФЙ ҳудудида жойлашган Baby Land (Kids academy) хусусий МТТ Таълим сифатини назорат қилиш давлат инспекцияси томонидан 2020 йил 9 март куни берилган хусусий мактабгача таълим ташкилотини ташкил этиш бўйича лицензия (№МТ 1248 сони) асосида фаолият олиб бораётгани аниқланган.

Ҳолат юзасидан дастлабки ўрганиш натижаларига кўра, кичик гуруҳ тарбиячиси И.Д. томонидан 24 март куни 2019 йилда туғилган тарбияланувчи У.Ф.га тан жароҳати етказилган. Ҳолат юзасидан тарбияланувчининг онаси И.Ш. томонидан туман ИИБга ёзма равишда мурожат қилинган, ҳозирги кунда туман ИИБ томонидан суруштирув ишлари олиб борилмоқда. Тадбиркор томонидан тарбиячи И.Д. билан тузилган меҳнат шартномаси бекор қилинган.

«Мактабгача таълим вазирлиги бундай ҳолатларда хусусий боғчалар лицензиясини бекор қилиш масаласини илгари суради. Ҳар бир тадбиркор ташкил этаётган болалар боғчаларига руҳий соғломлиги тўғрисидаги маълумотномалар асосида тарбиячи кўникмалари бор мутахассиларни жалб қилиши лозим», дейилган муносабатда.

Аввалроқ Самарқандда боғча тарбиячиси болалар танасига шприц тиққани ҳақида хабар берилган эди. Шунингдек, боғча болалари танасига шприц тиққан аёлнинг шахси аниқланган.