Урганчдаги LED экранда порнографик видео кўрсатилишига нима сабаб бўлгани маълум қилинди
Хоразм вилояти Урганч шаҳрида жойлашган LED мониторида порнографик видео акс этган видео кўрастилгани ҳақида ижтимоий тармоқларда хабар тарқалган, шаҳар ҳокимлиги ахборот хизмати ҳолат юзасидан муносабат билдирганди. Хоразм вилояти Ички ишлар бошқармаси ушбу ҳолатга нима сабаб бўлганини маълум қилди.
Келтирилишича, 31 март куни соат 19:20 да Хоразм вилояти ИИБ навбатчилик қисмига Урганч шаҳрининг Аль-Хоразмий ва Хонқа кўчаси чорраҳасида ўрнатилган реклама мониторида порнографик мазмундаги видео намойиш этилгани тўғрисида хабар келиб тушган.
Таъкидланишича, ушбу видеолавҳанинг реклама мониторидаги намойиши зудлик билан тўхтатилган. Олиб борилган дастлабки тезкор-суриштирув ишлари натижасида порнографик мазмундаги видеолавҳа реклама монитори тегишли бўлган хусусий фирма ишчиси, 1978 йилда туғилган И.И. томонидан реклама роликларини жойлаштириш жараёнида йўл қўйган эҳтиётсизлиги натижасида монитор хотирасига юклангани маълум бўлган.
«Ҳозирда ҳолат юзасидан ички ишлар органлари томонидан терговга қадар текширув ишлари олиб борилмоқда. Текширув натижалари юзасидан қўшимча ахборот берилади», дейилади хабарда.
Аввалроқ Наманган шаҳрида «Ёшлар дафтари»га киритилган Довудхон Ғуломжоновга эски ноутбук берилгани ва унинг ичидан беҳаё кинолар борлиги айтилган хабарлар ижтимоий тармоқларда тарқалганди. Шунингдек, Самарқанд вилояти Нуробод туманида IТ мусобақасида ғолиб бўлган 13 ёшли мактаб ўқувчисига эски ноутбук берилгани, бунинг ортидан туман «замҳокими» ҳайфсан олгани, сўнг ўқувчига янги ноутбук совға қилингани ҳақида хабар берилганди.
