«Forbes» дунё миллиардерлари рўйхатини эълон қилди. Биринчи ўринни 219 миллиард доллар капитал билан «SpaceX» ва «Tesla» раҳбари Илон Маск эгаллади.

Келтирилишича, етакчилик 4 йилдан буён «Amazon» раҳбари Жефф Безосга тегишли бўлган. Бироқ янгиланган миллиардерлар рўйхатида у 171 миллиард доллар билан иккинчи поғонадан жой олган. «Louis Vuitton Moеt Hennessy» гуруҳи президенти Бернард Арно 158 миллиард доллар билан кучли учликка якун ясаган.

Тўртинчи ўринни 129 миллиард долларлик капитал билан «Microsoft» асосчиси Билл Гейтс олган бўлса, бешинчи ўринни Уоррен Баффетт (118 миллиард доллар) ёпиб берган.

Рўйхатга кўра, 2021 йилда бешинчи ўринда бўлган Марк Цукерберг («Meta» раҳбари) бу сафар 67,3 миллиард бойлик билан ўн бешинчи ўринни қайд этган.

«Forbes» тақдим этган рўйхатда мингдан ортиқ миллиардер келтирилган. Америка умумий бойлиги 4,7 триллион долларга тенг 735 нафар миллиардерга эгалиги билан етакчилик қилмоқда. Хитой умумий қиймати 2,3 триллион долларга тенг 607 миллиардер билан иккинчи ўринни эгаллаган.

Аввалроқ «Forbes» дунёнинг энг ёш миллиардерини маълум қилганди.