Нукус шаҳрида 5 апрель куни «Damas» йўлдан ўтаётган эркакни уриб юборди. Бу ҳақда Йўл ҳаракати хавфсизлиги хизмати ахборот хизмати хабар берди.

Маълум қилинишича, шу куни соат тахминан 15:05 да шаҳар ҳудудидан ўтувчи 4P-176 автомобиль йўлининг 2–3 километрлари оралиғида 1996 йилда туғилган ҳайдовчи  М.Т. «Damas» русумли автомобилда ҳаракатланаётиб, тартибга солинмаган пиёдалар ўтиш жойидан велосипед бошқариб ўтаётган 1976 йилда туғилган Ж.А.ни уриб юборган.

Қайд этилишича, ЙТҲ оқибатида Ж.А. кўрсатилган тиббий ёрдамларга қарамасдан шифохонада вафот этган. Ҳолат юзасидан Нукус шаҳар Ички ишлар органлари фаолиятини мувофиқлаштириш бошқармаси тергов бошқармаси томонидан дастлабки тергов ҳаракатлари олиб борилмоқда.

Аввалроқ Тошкент шаҳрида 21 март куни «Nexia-3» йўлни кесиб ўтаётган 2 пиёдани уриб юборганди. Шунингдек, Наманган вилояти Наманган шаҳрида ҳайдовчилик гувоҳномаси бўлмаган 18 ёшли йигит машинада йўл-патрул хизмати ходимини уриб кетгани ҳақида хабар берилганди.