Қашқадарё вилоятида эркаклар уй ҳовлисида учта эшакни ёғоч билан калтаклагани акс этган видео ижтимоий тармоқларда тарқалди.

«Ekolog.uz» каналининг ёзишича, воқеа Китоб туманида бўлгани тахмин қилинмоқда. «Ижтимоий тармоқларда оммалашаётган бу видеодаги ваҳшийлар забонсиз ҳайвонларга озор бериб, қанчалик эшакдан ҳам ваҳшийроқ ҳайвон эканлигини кўрсатиб қўйди», — деб ёзади канал муаллифи.

Шунингдек, «Меҳр ва оқибат» ҳайвонларни ҳимоя қилиш жамияти ҳам ҳолат тўғрисида маълумот бериб, ҳайвонларни калтаклаш ёш боланинг кўз олдида содир бўлганини алоҳида таъкидлаган. Қайд этилишича, икки эркак ҳайвонларни фалаж қилиш учун бўйнига урган.

Жамият видеоролик иштирокчиларини топиб, қонун доирасида жазолаш учун Ички ишлар вазирлигига мурожаат қилган.

Маълумот учун, ҳайвонларга нисбатан шафқатсиз муносабатда бўлиш, яъни уларни ғаразли ёки бошқа паст ниятларда қийноққа солиш ёки уларга азоб бериш БҲМнинг 3 бараваридан 5 бараваригача (810 минг сўмдан 1 миллион 350 минг сўмгача) миқдорда жарима солишга сабаб бўлади.

Эслатиб ўтамиз, Фарғона вилоятининг Қувасой шаҳридаги чиқиндихонада 13 февраль куни ўнлаб ит отиб ташлангани ҳақида хабар берилганди. Шунингдек, Тошкентда 3 нафар қиз мушук боласини сувга ташлаб, чўктириб юборгани хабар қилинган.

Бундан ташқари, 2021 йилнинг ноябрь ойида Тошкент шаҳрида бир нечта йигит машинасида тунда уй ҳайвонларини босиб кетаётгани аниқланганди. «Spark» ва «Lacetti» ҳайдовчиси қўлга олиниб, уларга нисбатан тегишли чора кўрилган.