Андижон вилояти «Дўстлик» чегара постида 3 март куни 5,5 миллиард сўмлик товарларнинг нархи камайтириб ўтказилаётгани аниқланди. Бу ҳақда «Ўзбекистон 24» телеканалида маълум қилинди.

Маълум бўлишича, божхона постида 5780 долларлик товарлар ортилган юк машинасига кириб келган ва у тегишли тартибда текширувдан ўтказилган. Текширувда ҳужжатда кўрсатилган товарлардан ортиқроқ маҳсулот борлиги аниқланган.

Юк автомобили «Андижон» ташқи иқтисодий фаолият божхона постига текшириш учун божхона бошлиғини огоҳлантирган ҳолда юборилган. Аммо, машина текширилмасдан 30–40 дақиқа ичида пунктни тарк этган.

Ҳуқуқни муҳофаза қилувчи органлар томонидан транспорт воситаси кузтиб борилиб, шаҳарнинг Гулзор маҳалласида тўхтатилган ва омборга қайтарилган. Текширув давомида декларациядан ўтказилмаган 31 турдаги товар, кийим-кечак, пойабзал ва косметика маҳсулотлари аниқланган.

Қайд этилишича, қайта текширувдан кейин товарлар 5 миллиард 565 миллиондан сўмдан ортиқ нархланган. Улар қонуний расмийлаштирилганда, тўланиши керак бўлган божхона тўлови 1 миллиард 944 миллион сўмга етади. Мазкур ҳолат бўйича божхона пости раҳбари ва икки нафар ходимига нисбатан жиноят иши қўзғатилиб, ҳибсга олинган.