АОКАда 7 апрель куни ўтказилган матбуот анжуманида Ички ишлар вазирлиги Ҳуқуқбузарликлар профилактикаси хизмати бўлим бошлиғи Даврон Насриддинов Ўзбекистонда фуқаролар қандай ҳолатда пневматик қурол олиб юриши мумкинлиги ва уларнинг рўйхати шакллантирилиши борасидаги саволга жавоб берди. Бу ҳақда тадбирда иштирок этган «Bugun.uz» мухбири хабар қилди.

Қайд этилишича, фуқароларнинг пневматик қуроллардан фойдаланиши 2–3 йилда долзарб муаммолардан бири бўлиб бормоқда. Ушбу қуроллардан фойдаланиш 2019 йил 29 июлдаги 550-сонли «Қурол тўғрисида»ги қонун билан тартибга солинган.

«Қонунга асосан, пневматик қурол фуқаровий ов пневматик қурол сифатида баҳоланади. Унинг параметрлари ҳам қонун билан белгиланган, яъни оғиз қисмидаги қуввати 7,5 жун ва коллибри 4,5 миллиметрдан ошиқ бўлган пневматик қуроллар пневматик ов қуроли ҳисобланади. Бундан пастлари пневматик қурол ашёси сифатида баҳоланади.

Ҳозирда бунга нисбатан қонунчиликда жавобгарлик масаласи назарда тутилмаган. Ундан юқори бўлса, белгиланган тартибда фуқародан олиб қўйилади. Ҳозирги пайтда айни параметрлари паст бўлган пневматик қуроли бор фуқаролар рўйхатга олиняпти», — деди ИИВ вакили.

Шунингдек, у 2020 йилда барча фуқароларда мавжуд пневматик қуроллар Вазирлар Маҳкамасининг қарорига асосан мажбурий тартибда Ички ишлар органларида рўйхатдан ўтқазилиши керак деб шарт қўйилганини қайд этди. Бу шарт қайси бири қурол, қайси бири ашё эканлигини аниқлаб олиш мақсадида қилинганини таъкидлади. Бундан ташқари, ҳозирги кунда «Қурол тўғрисида»ги қонуннинг айрим моддалари, хусусан, жавобгарлик масаласи такомиллаштирилаётганини айтди.

Эслатиб ўтамиз, аввалроқ Наманганда жанговар қурол сотмоқчи бўлган фуқаро қўлга олингани ҳақида хабар берилганди. Бундан ташқари, Ўзбекистонда қуролдан фойдаланиш ёши 25 ёш этиб белгиланаёгани маълум қилинганди.