АОКАда 7 апрель куни ўтказилган матбуот анжуманида Ўзбекистонда ўз хизмат вазифаларига масъулиятсизлик билан ёндошган мингга яқин профилактика интизомий жазолангани маълум қилинди. Бу ҳақда унда иштирок этган «Bugun.uz» мухбири хабар қилди.

Қайд этилишича, Ички ишлар вазирлиги Ҳуқуқбузарликлар профилактикаси хизмати ва унинг ҳудудий бўлинмалари томонидан ўз ташаббуси билан рейдлар ўтказилган. Аниқланган 127 та хизмат интизомини бузиш ва 65 та маъмурий ҳуқуқбузарлик содир этиш ҳолатлари юзасидан айбдор ходимларга нисбатан тегишли чоралар кўрилган.

Шунингдек, ўз хизмат вазифаларига масъулиятсизлик билан ёндошган 948 нафар профилактика инспекторлари интизомий жазоланган. 176 нафари ички ишлар органларидан бўшатилган.

Маълумот ўрнида, республикада мавжуд 9314 та маҳаллаларнинг ҳар бирида камида бир нафардан профилактика инспектори фаолиятини йўлга қўйиш мақсадида қўшимча штат бирликлари ташкил этилган. Шунинг билан уларнинг сони 10 195 тага етказилган.

Эслатиб ўтамиз, аввалроқ Тошкентда профилактика инспектори ерда ётган аёлни тепаётгани акс этган видео бўйича изоҳ берилганди. Шу билан бирга, Тошкентда ИИБ ходимлари пора олаётганда ушлангани маълум қилинганди.