Қашқадарё вилоятида эркаклар уй ҳовлисида учта эшакни ёғоч билан калтаклагани акс этган видео ижтимоий тармоқларда тарқалганди. Вилоят суди бош консультанти Фарҳод Тилавовнинг «Bugun.uz»га маълум қилишича, эшакларни таёқ билан урган эркак 12 суткага қамалди.

Аниқлик киритилишича, видеода акс этган ҳолат 2021 йилда Чироқчи туманидаги Лангар МФЙ Тўрақул қишлоғида содир бўлган. Видеолавҳа иштирокчилари эса ота-ўғил бўлган.

Алишер Илёсов (ота) Маъмурий жавобгарлик тўғрисидаги кодекснинг 111-моддаси 2-қисми (Вояга етмаган шахс ҳозирлигида ҳайвонларга нисбатан шафқатсиз муносабатда бўлиш ёхуд ҳайвонларнинг майиб бўлишига олиб келиш) билан айбдор деб топилган. Унга нисбатан 12 сутка маъмурий қамоқ жазоси тайинланган.

Шунингдек, Б.С. (ўғил) вояга етмагани сабабли содир этган хатти-ҳаракати учун ҳам отаси Маъмурий жавобгарлик тўғрисидаги кодекснинг 47-моддаси (Болаларни тарбиялаш ва уларга таълим бериш борасидаги мажбуриятларни бажармаслик) билан айбли деб топилган ҳамда базавий ҳисоблаш миқдорининг бир баравари (270 минг сўм) миқдорида жаримага тортилган.

Эслатиб ўтамиз, Фарғона вилоятининг Қувасой шаҳридаги чиқиндихонада 13 февраль куни ўнлаб ит отиб ташлангани ҳақида хабар берилганди. Шунингдек, Тошкентда 3 нафар қиз мушук боласини сувга ташлаб, чўктириб юборгани хабар қилинган.

Бундан ташқари, 2021 йилнинг ноябрь ойида Тошкент шаҳрида бир нечта йигит машинасида тунда уй ҳайвонларини босиб кетаётгани аниқланганди. «Spark» ва «Lacetti» ҳайдовчиси қўлга олиниб, уларга нисбатан тегишли чора кўрилган.